ఎవరన్నారు టెస్ట్ క్రికెట్ ఆసక్తికరంగా ఉండదని?

ఇంతకు ముందే ముగిసిన ఆస్ట్రేలియా సౌతాఫ్రికా మ్యాచ్ చూశాక మరొక సారి తెలిసి వచ్చింది అస్సలు క్రికెట్ అంటే టెస్ట్ క్రికెట్టే అని. వెస్టిండీస్‌తో మన వాళ్ళు ఆడిన మొదటి రెండు మ్యాచ్‌లకూ అస్సలు ప్రేక్షకులే లేకపోవడంతో ఈ ఫార్మాట్‌లో క్రికెట్ ఎక్కువ కాలం మనలేదేమో అని భయం వేసింది కానీ, ఇలాంటి మ్యాచ్‌లు మరొక అయిదారు జరిగితే మళ్ళీ అసలయిన క్రికెట్ ప్రేమికులు ఈ అయిదు రోజుల వెర్షన్‌ని మళ్ళీ ఆదరించరూ?

 
చివరిలో డేల్ స్టెయిన్ వెసిన ఓవర్లో ప్యాట్ కమ్మిన్స్ కొట్టగా బుల్లెట్‌లా దూసుకు వచ్చిన బంతిని స్టెయిన్ పట్టుకొని ఉండి ఉంటే నరాలు తెగిపోయే ఉత్కంఠ వచ్చేది కదా?


మొత్తానికి ఇరు జట్లు సమంగా ప్రతిభ చూపిన సిరీస్ ఇలా డ్రాగా ముగియడమే సమంజసం. 

పిరుదులు పెంచడానికి సిమెంటు, కారు టైర్లు పంచర్లు వేసే మిశ్రమాన్ని ఇంజెక్షన్ చేసిన అమెరికన్ శంకర్ దాదా

నకిలీ డాక్టర్లు ఆపరేషన్స్ చేయడం మన లాంటి దేశాల్లోనే జరుగుతుంది అనుకుంటే పొరబాటే. అమెరికాలాంటి అన్ని చట్టాలు పటిష్టంగా ఉన్న దేశాల్లో కూడా ఇలాంటివి జరుగుతూ ఉంటాయి. శంకర్ దాదాలు అక్కడ కూడా ఉన్నారు. 


ఇప్పుడు ప్లాస్టిక్ సర్జరీ ద్వారా రొమ్ములు పెద్దవి చేసుకోవడమే కాకుండా పిరుదుల భాగం పెద్దవిగా గుండ్రంగా చేసుకోవడం అన్నది లేటెస్టు ట్రెండులాగా కనిపిస్తుంది. అయితే శిక్షణ పొందిన సర్జన్ ఆపరేషన్ చేయాలంటే చాలా ఖర్చు అవుతుంది కాబట్టి ఈ పనిని కోందరు నకిలీలు తక్కువ ఖర్చుతో లాగించేస్తున్నారు. 



అమెరికాలోని ఫ్లోరిడాలో ఆడవేషంలో ఉండే ఓనీల్ రాన్ మోరిస్ అనే ట్రాన్స్ జెండర్ పిరుదులని పెంచడానికి సిమెంటు, పంచరయిన టైర్లని సీలు వేయడానికి వాడే మిశ్రమాన్ని కలిపి ఇంజెక్షన్ రూపంలో ఎక్కించే విధానం ఒకటి కనిపెట్టాడు. తను కూడా అదే పద్దతిలో తన పిరుదులని పెంచుకున్నానని చెప్పి, చూపించి, ఒక అమ్మాయితో 35 వేల రూపాయలతో అగ్రిమెంట్ కుదుర్చుకొని వైద్యం చేశాడు. ఆ అమ్మయికి ఇంజెక్షన్ చేసిన దగ్గర తీవ్రమైన ఇన్ఫెక్షన్ రావడంతో హాస్పిటల్‌కి వెళ్ళింది. అక్కడ డాక్టర్లు ఈ "సరికొత్త" పద్దతి గురించి తెలుసుకొని షాక్ తిని పోలీసులకి ఫిర్యాదు చేశారు. దానితో పోలీసులు  కెసు నమోదు చేసి ఈ నకిలీ డాక్టరుని జైల్లో పెట్టారు.


     
నకిలీ డాక్టరు/డాక్టరమ్మ            ఇంజెక్షన్ చేసిన మిశ్రమం

ఈ సంవత్సరం ఫిబ్రవరిలో లండన్‌కి చెందిన క్లాడియా అడెరోటిమి అనే విద్యార్ధిని ఇలాగే ఒక నకిలీ డాక్టరు దగ్గర పిరుదుల్లోకి ఇంజెక్షన్ తీసుకొని దాని వల్ల కలిగిన కాంప్లికేషన్స్‌తో మరణించింది. పోయిన సంవత్సరం అమెరికాలోనే, మియామికి చెందిన అనా జోసెఫా సెవిల్లా అనే ఒక నకిలీ డాక్టరు పిరుదుల్లోకి ఇంజెక్షన్ ఇచ్చే ప్రాక్టీసు చేస్తుంటే పోలీసులు పట్టుకున్నారు.
 
                           క్లాడియా అడెరోటిమి


Breast aumrntation తరువాత ఆడవారు ఇటీవల ఎక్కువగా చేయించుకుంటున్నది పిరుదులు పెద్దగా, గుండ్రంగా కనిపించేలా చేసే buttock augmentation ఆపరేషన్. దీనిలో కూడ ఎక్కువ మంది అమ్మాయిలు అమెరికన్ సింగర్ జెన్నిఫర్ లోపెజ్, ఇటీవల బ్రిటన్ యువరాజు విలియమ్ పెళ్ళాడిన కేట్ మిడిల్‌టన్ చెల్లెలు పిప్పా మిడిల్‌టన్, న్యూయార్క్ సోషలైట్ కిమ్ కర్డాషియన్‌లను పోలి ఉండేలా తమ పిరుదులని డిజైన్ చేయించుకుంటున్నారట. మియామీలోని ప్లాస్టిక్ సర్జన్ క్రిస్టియానో మెండియేటా అయితే Pippa Butt Lift అని ఈ ఆపరేషన్‌కి ఒక పేరు కూడా పెట్టి ఎడా పెడా అమ్మాయిల వెనుక భాగాన్ని మార్చేస్తున్నాడట.
    



ఇంత విషయం ఉంది కాబట్టే జెన్నిఫర్ లోపెజ్ తన వక్షాలని వంద మిలియన్ డాలర్లకి ఇన్స్యూర్ చేస్తే, కాళ్ళని పిరుదులనీ కలిపి మూడు వందల డాలర్లకి ఇన్స్యూర్ చేసింది.  

జగన్ మోహన్ రెడ్డి గారూ, ఆ పోజు కొంచెం మార్చండి ప్లీజ్.

ప్రతి రోజూ మా ఇంటికి హిందూ కన్నా సాక్షి ముందుగా వస్తూండడం వలన, మాతృ బాష మీద అభిమానం వలన సాక్షి పూర్తిగా తిప్పడం నాకు తప్పడం లేదు. ప్రతి రోజూ ఏదో ఒక పెళ్ళికో, చావుకో మరేదో ఫంక్షన్‌కి హాజరయిన జగన్ ఫోటో ఒకటయినా ఎదో ఒక పేజీలో ఉండి తీరుతుంది. సరే, పత్రిక అన్నది కాబట్టి అన్న ఫోటో ఉంటే తప్పేమీ లేదనుకోండి. అయితే ప్రతి ఫోటోలోనూ అన్న పోజు ఒకేలాగా చూసి చిరాకెత్తుతూంది.
  

మెడ ఒకవైపు వంచి తల ఒక వైపు వాల్చడం, రెండు చేతులు మోచేతుల వద్ద ముడిచి ఒక చెత్తో మరొక చేతి వేళ్ళు పట్టుకొని పెదాలు తెరవకుండా, మరికొన్ని సెకన్లలో బాత్‌రూమ్‌కి వెళ్ళాల్సిన వాడిలా ఒక బలవంతపు నవ్వు పులుముకొని అదే పోజుతో కాకుండా కొత్త పోజు పెట్టమని ఎవరయినా అన్నతో చెబితే బావుణ్ణు.

ఆన్ లైన్‌లో పరిచయమైన అమ్మాయిలు రూమ్‌కి పిలిస్తే వెళ్ళాడు, కట్టేసి ఒళ్ళంతా కోసి పెట్టారు

ఒకప్పట్లో యండమూరి వీరేంద్రనాధ్ నవల వెన్నెల్లో ఆడపిల్ల పాఠకులని విపరీతంగా ఆకట్తుకున్నది. అందులో చదరంగంలో గ్రాండ్ మాస్టర్‌కీ ఒక అమ్మాయికీ ఫోన్‌లో జరిగే పరిచయం, ఆ అమ్మాయి తనెవరో చెప్పకుండా తనెక్కడ ఉంటుందో, ఎలా కలుసుకోవాలో ఫోన్‌లో గణిత ఫార్ములాలు ఉపయోగించి సాల్వ్ చేసే క్లూలు ఇచ్చి హీరోని పరీక్షిస్తూ ఉంటుంది. హీరో కూడా మామూలుగా యండమూరి నవలల్లో ఉన్నట్టుగానే మేధావి కావడం వల్ల ఇట్టే సాల్వ్ చేసి పారేసి, కొన్ని కాకతాళీయ పరిస్థితుల మూలంగా ఆమెని కలుసుకోవడం మిస్సవుతూ ఉంటాడు. ఇలా మూడు వందల పేజీలు ఒకరినొకరు కలుసుకోకుండా గడిపేస్తారు.
 


ఆ తరువాత అదే ఆంధ్ర భూమి వీక్లీలోనే పయనమయే ప్రియతమా అని బొమ్మదేవర నాగకుమారి రాసిన ఒక సీరియల్‌లో కూడా హిరో హీరోయిన్లు చాలా వారాలు కలం స్నేహంతో పరిచయమయి అలానే ఉత్తరాలు రాసుకుంటూ ఉంటారు. అయితే ఇప్పుడు ఈ ఉత్తరాలు పోయి సోషల్ వెబ్ సైట్లు వచ్చేశాయి. వాటి ద్వారా పరిచయాలు ఏర్పడి వాటికే పరిమితమయేవి కొన్నయితే ఆ పరిచయాలు పెరిగేవి కొన్ని ఉంటాయి. కొన్ని సార్లు ఆన్‌లైన్‌లో ఏర్పడే ఈ పరిచయాలు విపరీత పరిణామాలకి దారి తీస్తాయి. ఒక ఉదాహరణ చూడండి.

అమెరికాలోని ఆరిజోనా రాష్ట్రంలోని ఫీనిక్స్‌లో జరిగిన సంఘటన ఇది. ఒక పద్దెనిమిదేళ్ళ కుర్రాడు(అతని పెరు పోలీసులు బయట పెట్టలేదు) ఒక అమ్మాయితో ఆన్‌లైన్‌లో పరిచయం ఏర్పరచుకొన్నాడు. ఆ అమ్మాయి, ఆమెతో కలిసి ఉంటున్నరూమ్‌‌మేట్ ఇతన్ని తమ ఫ్లాట్‌కి రమ్మని ఆహ్వానించారు. ఎరగా సెక్స్ ఆశ చూపించారు. దానితో ఇతగాడు ఆశగా వారి ఫ్లాట్‌కి వెళ్ళాడు. ఆక్కడికి వెళ్ళాక మొదలయింది నరకం. 
 
   రెబెక్కా చాండ్లర్, రేవన్ లారాబీ


వెరయిటీ సెక్స్ అని చెప్పి ఇతని కాళ్ళూ చేతులు కట్టి వేశారు. ఇదేదో తమాషా ఆట అని అనుకున్న అతన్ని రెబెక్కా చాండ్లర్,రేవన్ లారాబీ అనే ఈ ఇద్దరు అమ్మాయిలు రెండు రోజులపాటు బ్లేడు పెట్టి  వొళ్లంతా గాట్లు పెట్టి స్వర్గంలో విహరించాలని వచ్చిన చిన్న వాడికి నరకం ఎలా ఉంటుందో రుచి చూపించారు. ఎట్టకేలకు బయట పడి పోలీసులకు ఫోన్ చేయడంతో వాళ్లు వచ్చి ఆ ఫ్లాట్‌లో చూడగా The Werewolf's Guide to Life, The Necromantic Ritual Rule Book, Intro to Sigilborne Spirits లాంటి క్షుద్ర విద్యల పుస్తకాలు కనిపించాయి. 
  


చేతులు కాళ్ళు కట్టేసి శృంగారం చేయడం, బ్లేడు పెట్టి కోయడం ముగ్గురూ ఇష్టపడే ప్రారంభించామనీ, మధ్యలో అడ్డం తిరిగి ఆ అబ్బాయికి కొన్ని గాట్లు ఎక్కువ పడ్డాయని ఆ అమ్మాయిలు పొలీసులతో చెప్పారు. పోలీసులు తలలు పట్టుకొని అతన్ని హాస్పిటల్‌లో చేర్పించి వైద్యం ముదలు పెట్టారు.

కడప పెద్ద దర్గా

ఏ.ఆర్. రెహ్‌మాన్ కడప పెద్ద దర్గాని దర్శించుకున్నాక ఆస్కార్ అవార్డు గెలిచాక ఈ దర్గా బాగా పాపులరయింది. ఆ తరువాత ఐశ్వర్యా రాయ్, అభిషేక్ బచ్చన్, మగధీర సినిమాకి ముందు రామ్ చరణ్ తేజ ఈ దర్గాని దర్శించుకోవడం, మగ ధీర సూపర్ డూపర్ హిట్ కావడంతో మతాలకి అతీతంగా ఈ దర్గాకి సందర్శకుల తాకిడి పెరిగిపోయింది. ఎందరు వచ్చినా ఈ దర్గాకి పెట్టని బ్రాండ్ అంబాసడర్ రెహ్మానే. "నెలకి ఒకసారయినా ఆయన వచ్చిపోతూ ఉంటాడు" అని చెప్పాడు దర్గాలో ఉండే ఇమామ్.

ఇక్కడికి వచ్చిన భక్తులు ఏ కోరిక కోరినా తీరుతుంది అన్న నమ్మకం ఉండడంతో, రెహ్మాన్, రామ్ చరణ్‌ల విషయంలో అది నిజం కావడంతో ఇటీవల ఈ దర్గాకి మతాలతో సంబంధం లేకుండా భక్తుల తాకిడి ఎక్కువ అయింది. ఈ దర్గాకి మూడు వందల సంవత్సరాల చరిత్ర ఉంది. పీరుల్లా హుస్సేని, అరీఫుల్లా హుస్సేని అనే ఇద్దరు ముస్లిం సాధువుల సమాధులు ఇక్కడ ఉన్నాయి. 



ఖ్వాజా పీరుల్లా హుస్సేని, ఈయన్ని పీరుల్లా మాలిక్ అని పిలుస్తారు, 16వ శతాబ్ధిలో కర్ణాటకలోని బీదర్‌లో జన్మించాడు. ఈయన మహమ్మద్ ప్రవక్త వంశానికి చెందిన వాడు అంటారు. సూఫీ మతానికి చెందిన సాధువుల సమాధులను దర్శించుకుంటూ అజ్మీర్‌‍లోని ఖ్వాజా మొయినుద్దీన్ చిష్టి సమాధిని దర్శించుకున్నప్పుడు కడప ప్రాంతానికి వెళ్ళమని ఆగ్న లభించిందట. అలావస్తూ ప్రస్తుత చెన్నూరు దగ్గర పెన్నా నది ఒడ్డున విడిది చేసి ఉన్నప్పుడు సిద్ధవటం నవాబు నేక్ నామా సాహెబ్ ఈయన్ని దర్శించుకొని ఆశీస్సులు పొందాడు. ఆ నవాబు పీరుల్లా మాలిక్ ఉండడానికి తగిన సదుపాయాలను కల్పించగా అక్కడే ఉండి శాంతి, కరుణ, సామరస్యం అందరికీ బోధిస్తూ ఉన్నాడు పీరుల్లామాలిక్.


ప్రచారంలో ఒక కథ ప్రకారం అతి తక్కువ కాలంలో ఈయనకి వచ్చిన పేరు కొందరు ముస్లిం పెద్దలకు నచ్చక వారు ఈయన మోసగాడు అని ప్రచారం చేసి, ఏదైనా అద్భుతం చూపిస్తేనే నిన్ను నమ్ముతాం అని చాలెంజ్ చేశారు. అప్పటికప్పుడు భూమి విడిపోయి పీరుల్లా మాలిక్‌ని తనలో కలిపేసుకుందట. ఇది జరిగింది 1716ల, మొహర్రం నెల పదవ రోజున. అలా జీవ సమాధి అయిన పీరుల్లా మాలిక్ మూడు రోజుల తరువాత బయటకి వచ్చి ప్రార్ధనలు చేయడం భక్తులు చూశారు. దాంతో పీరుల్లా మాలిక్ శక్తి మీద అందరికీ అనుమానాలు తొలిగి పోయాయి. ఆ తరువాత కాలంలో నవాబ్ అబ్దుల్ హమీద్ ఖాన్ ఆయనకి ఒక సమాధి కట్టించారు. ఇప్పుడు పెద్ద దర్గాలో తూర్పు వైపు ఈ సమాధి ఉంది.


పీరుల్లా మాలిక్‌కి ఇద్దరు కొడుకులు. వీరిలో ఒకరు అరీఫుల్లా హుస్సేన్. ఈయన కూడా నాన్నగారి బాటలో నడిచాడు. ఈయన మనవడు అరీఫుల్లా హుస్సేన్-2. పీరుల్లా మాలిక్‌లాగా ఈయన కూడా సూఫీ తత్వవేత్తగా బాగా పేరు గడించాడు. ప్రచారంలో ఉన్న ఒక కథ ప్రకారం ఒకసారి తన పూర్వీకుల సమాధులు దర్శించుకోవడానికి ఈయన బీదర్ వెళ్ళాడు. అక్కడ ఉన్న కాపలాదారు ఈయన్ని లోపలికి వెళ్ళనీయలేదు. గేటు ముందు నిలుచుని తాతా అని పిలవగానే సమాధి లోపల నుండి రా మనవడా అన్న పిలుపు వినిపించి తలుపులు వాటంతట అవే తెరుచుకున్నాయట. ఈయన సమాధి కూడా ఇక్కడ ఉంది. ముస్లిం కాలెండర్ ప్రకారం అయిదవ నెలలో ఈయన పేరిట ఇక్కడ ఉరుసు జరుపుతారు. ఈ ఉరుసుకి దేశం నాలుగు మూలల నుండి భక్తులు వస్తారు. రెండు రోజులు జరిగే ఈ ఉత్సవంలో భక్తులు ఆయన సమాధికి చద్దార్ అర్పిస్తారు. రెహ్మాన్, చరణ్ లాంటి సందర్శకులు ఈ సమాధి సందర్శించినప్పుడు వారి తలమీద పోటోలో కనిపించేది ఇదే.. 



"మీరు నాకు అది కావాలి, ఇది కావాలి అని ఆశించి ఇక్కడికి రావొద్దు. అల్లాని ప్రార్దించండి. మికు ఏం కావాలో ఆయనకి తెలుసు. అది మీకు దొరికేలా ఆయనే చేస్తాడు" అని చెప్పాడు ఒక సాధువు.




ఇందిరా గాంధీ, పీవీ నరసింహా రావు, నీలం సంజీవ రెడ్డి, మహ్మద్ రఫీ లాంటి వాళ్లు ఎందరో ఈ దర్గాని దర్శించుకున్న లిస్టులో ఉన్నారు.

72 రోజుల్లో పెళ్ళి+హనీమూన్+విడాకులు=కోట్లు కోట్లు

పెళ్ళి, హనీ మూన్, విడాకులు ఇవన్నీ డబ్బు వదిలించే పనులు. కానీ ఇది మనలాంటి మామూలు మనుషులకు. సెలబ్రిటీలు, పేజ్-3 జీవులు కొందరు ఉంటారు. వారికి ఇవన్నీ డబ్బులు పుట్టించే వ్యవహారాలు. వాళ్ళు పెళ్ళి గురించి ప్రకటన చేస్తే డబ్బు, పెళ్ళి చేసుకుంటే డబ్బు, హనీ మూన్‌కి వెళ్తే డబ్బు, చివరికి విడాకులు తీసుకున్నా డబ్బే. అమెరికాలో కిమ్ కర్డాషియాన్ అన్న టీవీ రియాలిటీ షో యాక్టర్, మోడల్, అడపా దడపా నటి ఈ విషయాన్ని ఇటీవల నిజం చేసి చూపించింది. 




31 సంవత్సరాల ఈ చిన్నది రెండు నెలల క్రితం క్రిస్ హంఫ్రీస్ అనే 26 సంవత్సరాల బాస్కెట్ బాల్ ఆటగాడిని పెళ్ళి చేసుకుంది. ఇది అతనికి మొదటి పెళ్ళి కాగా అమ్మడికి రెండవది.



 పెళ్ళి గురీంచిన ప్రకటన తమ పత్రికలోనే రావడానికి  ఒక పత్రిక అమ్మడికి మిలియన్ డాలర్లు ఇచ్చిందట. పెళ్ళి ఫోటోల ఎక్స్‌క్లూజివ్ రైట్స్ కోసం పీపుల్ అన్న పత్రిక ఒకటిన్నర మిలియన్లు అంటే అటూ ఇటూగా ఏడున్నర కోట్ల రూపాయలు, సమర్పించుకుంది. ఇక పెళ్ళి తంతు వీడియోని E!న్యూస్ చానల్ మరింత డబ్బు ఇచ్చుకొని కొనుక్కుంది. పెళ్ళికి వచ్చిన బహుమతుల విలువ కూడా కోట్లలో ఉంటుంది.




హనీమూన్ కోసం ఇటలీలో ఒక ఖరీదైన రిసార్టుకి వెళ్ళి ఆ ఫోటోలని పత్రికలకి అమ్మి సొమ్ము చేసుకుంది.
  
 చిలకా గోరింకల్లా పది వారాలు గడిపి సరిగ్గా 72 రోజులకి విడాకులు తీసుకున్నారు. విడాకుల వార్త బయటకి పొక్కగానే వీళ్ల పెళ్ళి వీడియో మళ్ళీ టెలికాస్టు చేసి E!న్యూస్ మళ్ళీ రేటింగులు పెంచుకుంది. పెళ్ళికి బహుమతులు సమర్పించుకున్న వాళ్ళు ఫీలవకూడదని ఓ రెండు లక్షల డాలర్లు చారిటీకి ఇస్తానని ప్రకటించింది ఈ కిమ్ ముద్దుగుమ్మ.


అయితే ఈ కర్డాషియన్‌ల గురించి బాగా తెలిసిన వాళ్ళు ఇదంతా డబ్బు కోసం ఈ చిన్నది ఆడుతున్న నాటకమని మధ్యలో ఈ మొగుడు పాత్ర వేసినవాడు ఫూల్ అయిపోయాడని అంటున్నారు.ఇప్పుడు ఈ విడాకుల వ్యవహారంలో ఇంకెంత డబ్బు పోగేస్తుందో ఈ చిన్నది అని అప్పుడే కొందరు లెక్కలేయడం ప్రారంభించారు.

అయితే ఈ తొక్కలో పెళ్ళికి సంబంధించిన ఫోటోలు, వీడియోలు అంతలా కోట్లు పోసి కొనుక్కొని చూపించడం, అవి నోళ్ళు వెళ్ల బెట్టుకొని చూసే ప్రేక్షకులు ఉండడం చూశాక మన టీవీ చానళ్లలో డైలీ సీరియళ్ళు చూసే వాళ్ల మీద నాకున్న దురభిప్రాయం చాలా వరకూ తొలిగిపోయింది.

శవం లేచి నడిచి వస్తే

శవాలు కూడా లేచి కూర్చునే అందం నీది అంటాడు రాజేంద్ర ప్రసాద్ ఒక అమ్మాయితో తేనెటీగ సినిమాలో. శవాలు సమాధుల్లోంచి లేచి డాన్స్ చేస్తాయి మైకేల్ జాక్సన్ థ్రిల్లర్ పాటలో. చిరంజీవి కూడా కాష్మోరా కౌగిలిస్తే ఏం చెస్తావో అని ఆ పాటని కాపీ కొట్టి శవాలని లేపాడు ఒక పాటలో. శవం పోస్ట్ మార్టం బల్ల పైనుండి లేచి వస్తే ఎలా ఉంటుందో హైడీ క్లమ్ అనే మోడల్/నటి/ఫ్యాషన్ డిజైనర్ మొన్న ఒక పార్టీలో చూపించింది.


 
అక్టోబర్ 31న హాలొవీన్ అనే దెయ్యల పండగ చేసుకుంటారు అమెరికా వాళ్ళు. ఇంటి ముందు ఒక గుమ్మడి కాయని లోపల గుజ్జు తీసి, దీపం వెలిగించి తగిలిస్తారు. పిల్లలు దెయ్యాల మాస్కులు ధరించి ఇంటింటికి వెళ్ళి ట్రిక్ ఆర్ ట్రీట్ అని కేకులు, చాక్‌లెట్లూ దండుకుంటారు. ఇందులో భాగంగా ఒక ఫ్యాన్సీడ్రెస్ వెడుకలో హెయిడీ క్లమ్ అనే ఈ అమ్మడు ఇలా పోస్ట్ మార్టం జరుపుకున్న శవంలా రంగులు వేసుకుని, మరింత సహజత్వం కోసం ఒక స్ట్రెచర్ మీద పక్కన రక్తం మరకలయిన డాక్టరుతొ సహా ఎంట్రీ ఇచ్చింది.


     
ఆ రంగులు కూడా చాలా సహజంగా అనాటమీ టెక్స్ట్ బుక్‌లో చూసి వేసినట్టు వేశాడు ఆ పెయింటర్. "చర్మం తొలిగిస్తే శవం ఎలా ఉంటుందో అలా కనిపించాలని ఎనిమిది గంటలపాటు కదలకుండా కూర్చుని ఈ వేషం వేశాను" అని చెప్పుకొచ్చింది ఈ అమ్మడు. మొత్తానికి ఈమె శ్రమ ఫలించి వచ్చిన అతిధులు ఈ వేషాన్ని చూడగానే వావ్ అన్నారట.