ప్రభుత్వాసుపత్రుల గురించి జగన్ అవగాహనా రాహిత్యం. జగన్ చెప్పినట్లు జరిగితే ఈ ఆసుపత్రుల భవితవ్యం

ఇడుపులపాయలో వైఎస్సార్ కాంగ్రెస్ ఫార్టీ ప్లీనరీ అందరూ అనుకున్నట్టుగానే జరిగింది. జగన్ తన ఉపన్యాసంలో ఆకాశాన్ని దించి ప్రజల అరచేతిలో పట్టే ప్రయత్నం చేశాడు. అందులో ఎటువంటి తప్పు లేదు. కొత్త పార్టీ, అధికారంలోకి రావాలనుకొనే పార్టీ, ఆమాత్రం వాగ్ధానాలు సహజమే. తెలంగాణా పైన అటూఇటూ కాకుండా తన విధానాన్ని చెప్పాడు. ఇది కూడా అర్ధం చేసుకోవచ్చు. వంద సంవత్సరాల పైగా చరిత్ర ఉన్న కాంగ్రెస్, మూడు దశబ్ధాల తెలుగుదేశమే ఈ అంశమ్మీద రెండు నాల్కల ధోరణిలో ఉన్నాయి. పొత్తిళ్ళలో ఉన్న ఈ కొత్త పార్టీ నుంచి స్పష్టమైన వైఖరి ఆశించడం తప్పే అవుతుంది.


 
అయితే తన ఉపన్యాసంలో జగన్ ఆరోగ్యశ్రీ గురించి ప్రస్తావించినప్పుడు రెండు వ్యాఖ్యలు చేశాడు. ఆరోగ్యశ్రీలో ఉన్న కొన్ని ఆపరేషన్లని ప్రభుత్వ ఆసుపత్రుల్లోనే చేయాలని ప్రభుత్వం నిర్ణయించిదనీ, వీటిని చేయడానికి ప్రభుత్వ ఆసుపత్రులలో మౌళిక సదుపాయాలు లేవని, తాను అధికారంలోకి వస్తే అన్ని వ్యాధులని ఆరోగ్యశ్రీలో చేర్చి కార్పొరేట్ హాస్పిటల్స్‌లోనే వైద్యం జరిగేలా చూస్తామని అన్నారు. తన తండ్రికి ఎన్నికల సమరంలో పాశుపతాస్త్రంలా ఉపయోగపడిన ఆరోగ్యశ్రీని మరింత పదును పెట్టి వాడుకోవాలనుకోవడంలో తప్పు లేదు కానీ, ఈ పథకాన్ని ఎలా ఎన్నికల్లో వాడుకోవాలి అన్న విషయంలో తప్ప ప్రభుత్వాసుపత్రుల గురించి కాని, ఆరోగ్యశ్రీ పని తీరు గురించికానీ జగన్‌కి అవగాహన లేదని తెలిసిపోతుంది.


   
ప్రభుత్వాసుపత్రులలో ఉన్న సదుపాయాలు చాలా ప్రైవేటు ఆసుపత్రులలో ఉండవు.ట్రైన్‌డ్ నర్సులూ, ట్రైన్‌డ్ వార్డ్ బాయ్‌లూ చాలా ప్రైవాటు హాస్పిటల్స్‌లో ఉండరు. ఎవరో ఒకరిని తీసుకొచ్చి పని చేయించుకుంటారు. క్రమేపీ వాళ్ళు అనుభవం గడించి పని నేర్చుకుంటారు. ఇక డాక్టర్ల విషాయానికొస్తే హైలీ క్వాలిఫైడ్ ప్రొఫెసర్లూ, అసిస్టెంట్ ప్రొఫెసర్లూ ఉంటారు. ఎటొచ్చీ వారితో పని చేయించడమే కష్టం. ఇక ఉన్న లోపమల్లా ఖరీదైన ఎక్విప్‌మెంట్ అన్ని చోట్లా ఉండకపోవచ్చు.


ధన మూలం ఇదం జగత్ అన్నారు. ప్రభుత్వాసుపత్రులలో చేయదగ్గ ఆపరేషన్లు అక్కడ మాత్రమే చేయించుకోవాల్ని నిబంధన పెట్టి వాటికి ఆరోగ్యశ్రీ నుంచి ఇచ్చే డబ్బుని హాస్పిటల్‌కీ డాక్టర్‌కీ ఇస్తే ఆపరేషన్‌లు చేయించుకోవడానికి పేషంట్లు వస్తారు, డాక్టర్లకీ మోటివేషన్ ఉంటుంది. హాస్పిటల్ కూడా డబ్బు సంపాదించి ఆధునిక పరికరాలు సమకూర్చుకో గలుగుతుంది. ప్రభుత్వ ఉద్యోగులతో బలవంతంగా వాళ్ళు న్యాయంగా చేయాల్సిన పని వారి చ్వేత చేయించాలని చూసిన చంద్రబాబు ఏమయ్యాడో చూశాం కాబట్టి ఇలా డబ్బు ఇన్సెంటివ్ చూపి పని చేయించడమే మంచిది.


ఈ దిశగా పోయిన వారం ఆరోగ్య శాఖా మంత్రి రవీంద్రా రెడ్డి అపెండెక్టమీ, హిస్టిరెక్టమీ లాంటి ప్రభుత్వాసుపత్రులలో చేయదగ్గ ఆపరేషన్లు అక్కడే జరిగేలా చూస్తామని ఒక స్టేట్‌మెంట్ ఇచ్చారు. దానిపై జగన్ ఇలా దాడి చేశారు.


జగన్ చెప్పినట్లు అన్ని రకాల ఆపరేషన్లు  కార్పొరేట్ హాస్పిటల్స్‌లో మాత్రమే చేసేలా ప్రభుత్వాసుపత్రి కాకుల్ని కొట్టి కార్పొరేట్ గద్దలకి వేసే పద్ధతిని మరింత తీవ్రం చేస్తే ఏం జరుగుతుంది?


ప్రభుత్వాసుపత్రులలో ఆపరేషన్లు జరగక అక్కడ వైద్య విద్య అభ్యసించే విద్యార్ధులు కేవలం థియరీ తప్ప ప్రాక్టికల్సు లేని డమ్మీ డాక్టర్లుగా బయటికొస్తారు. అసలు పేషంట్లే లేనప్పుడు ఈ హాస్పిటల్స్ మాత్రం ఎందుకని ప్రభుత్వాసుపత్రులని కార్పొరేట్ హాస్పిటల్స్‌కి లీజుకి ఇచ్చి పారేస్తారు. వాళ్ళు అక్కడ మెడికల్ కాలేజీలో, మరిన్ని కార్పొరేట్ హాస్పిటల్సో కట్టుకుంటారు. ఇందుకయ్యే ఖర్చు కూడా ఆరోగ్యశ్రీ కింద ప్రభుత్వమే వాళ్ళకి సమర్పించుకొంటుంది.