ఈ రెండు చానళ్ళని బహిష్కరించండి.

ఇప్పటిదాకా ఈనాడు,సాక్షి పేపర్ల మధ్య నడుస్తున్న వీధి పోరాటం ఇప్పుడు టీవీ చానళ్ళకు పాకింది. అయితే ఈ యుద్ధంలో సాక్షితో పోరాడుతున్నది స్టూడియో ఎన్. దీన్ని పోరాటం అనే కన్నా పిచ్చికుక్కల కాట్లాట అంటే సమంజసంగా ఉంటుంది.

నిన్నటిదాకా వైఎస్, జగన్ ల ఆస్తులపైన, వాళ్ళ రాజ ప్రాసాదాల పైన స్టూడియోఎన్ వరుస కథనాలు ప్రసారం చేసింది. అందులో భాగంగా హైదరాబాద్ లో నిర్మాణంలో ఉన్న ఒక జగన్ బంగళా లోకి చొచ్చుకుపోవడానికి ప్రయత్నిస్తే అక్కడున్న సెక్యూరిటీ సిబ్బంది అడ్డుకోవడం దాన్ని మీడియాపైన దాడిగా స్టూడియోఎన్ ప్రసారం చేయడం జరిగింది.

ఇప్పుడు సీన్ వంతాడకు మారింది. అక్రమ మైనింగ్ పైన పోరాటం చేస్తానని చంద్రబాబు నాయుడు వంతాడకు పోవడం అక్కడ గిరిజన మహిళలతో ఇంటరాక్షన్ సమయంలో ఆయన చేతిని విదిలించడం, దాన్ని అమాయక గిరిజన మహిళలమీద దాడిగా సాక్షి చానలు,పేపరు నానా యాగీ చేయడం, దానిని ప్రతిగా స్టూడియోఎన్ వాళ్ళు చంద్ర బాబు ఎవరిని కొట్టాడని సాక్షి వాళ్ళు యాగీ చేశారో ఆమెని పట్టుకొచ్చి ఆమె చేత రెండు ముక్కలు మళ్ళీ మళ్ళీ చెప్పించి చూసే వాళ్ళకి నరకం చూపించారు.మరుసటి రోజు ఇంకో చానల్ వాళ్ళు ఒక దళిత నాయకుడినీ, టీడీపీ నాయకుడ్నీ పట్టుకొచ్చి ఒక దిక్కుమాలిన చర్చ.

చానల్ పెట్టి ఇరవై నాలుగ్గంటలూ సొంత అజెండాతో నడిపిస్తే ఎలా? కనీసం ప్రేక్షకుడంటూ ఒకడుంటాడన్న స్పృహ లేకపోతే ఎలా? అందుకని ఈ రెండు చానళ్ళ ధోరణిపైన విసుగెత్తిన వాళ్ళు వీటిని బహిష్కరిస్తే ఓపనయిపోతుందని నా ఉద్ధేశ్యం. అప్పుడు మిగిలిన వాళ్ళు కూడా బుద్ధి తెచ్చుకొని ప్రేక్షకుడికి విలువనిస్తారని ఆశ.