చంద్రబాబు దీక్షపై చిరంజీవి వ్యాఖ్యలు సమంజసమా?

చంద్రబాబు నాయుడిని రామేశ్వరం పోయినా శనేశ్వరం వదలదు అన్న సామెత నిజం చేయడానికా అన్నట్లు రెండు విషయాలు వెంటాడుతున్నాయి. ఒకటి వెన్నుపోటు దారుడు అన్న ముద్ర. దేశ రాష్ట్ర రాజకీయాల్లో వెన్నుపోటుదారులు లెక్కకు మిక్కిలిగా ఉన్నారు, ఈయనొక్కడే కాదు, వెన్నుపోటు అనేది ఈయనతో మొదలు కాలేదు, ఈయనతో ముగిసిపోనూ లేదు అని లోగడ ఇక్కడే తారకం గారు సోదాహరణంగా ఒక పోస్టులో నిరూపించారు.http://tarakam55.blogspot.com/2010/10/blog-post_27.html అయినా కంగ్రెసోళ్ళు మటికొస్తే దానినే పదే పదే బయటికి తీస్తున్నారు.
 
ఇక రెండవది లోగడ తాను ముఖ్యమంత్రిగా ఉండగా వ్యవసాయం దండగ అని అన్న మాట. ప్రపంచ బ్యాంకు పే రోల్ లో ఉన్నప్పుడు ఆయన అలా అని ఉండవచ్చేమో గానీ దాన్ని ఈనాటికీ ఆయనకి వ్యతిరేకంగా బయటికి తీస్తున్నారు. ఈరోజు తాజాగా బాబు చేపట్టిన నిరవధిక నిరాహార దీక్షని కామెంటు చేస్తూ చిరంజీవి మళ్ళీ దాన్ని బయటకి లాగి "ఆనాడు ఆ మాట అన్న పెద్ద మనిషి ఇప్పుడు రైతుల కోసం దీక్ష చేపట్టడం అధికారం కోసం కాదా అని" ప్రశ్నించాడు.
 
ఈ కాంటెక్స్ట్ లో చిరంజీవిని రెండు ప్రశ్నలడగదలచాను. మొదటిది రాజకీయం అంటేనే మాటలు మార్చడం కాదా? పార్టీ పెట్టిన తొలి నాళ్ళలో కాంగ్రెస్ పార్టీని మీరూ మీ వాళ్ళూ దుమ్మెత్తి పోయలేదా, పంచలు ఊడదీసి మరీ కొట్టాలని తమ్ముడుంగారు మీ శ్రేణులకి పిలుపు నివ్వలేదా? ఇప్పుడు అదే కాంగ్రెస్ వాళ్ళు మీకు అత్యంత ఆప్తులయిపోలేదా? అవసరం అయితే కాంగ్రెస్ ప్రభుత్వానికి మద్ధతునిచ్చి కాపాడడానికైనా సిద్ధం అని మీరు ప్రకటించలేదా?
 
రెండవది అధికార సాధన తప్ప రాజకీయ పార్టీలకు, కలియుగంలో అధికారం సాధించడానికి ఏ మాత్రం అవకాశం లేని లోక్ సత్తా లాంటి వాటికి తప్ప, మరొక అజెండా ఏదైనా ఉందా? తమరు పార్టీ పెట్టిన మొదట్లో అధికారం సాధించేస్తామని పగటి కలలు కనడం వల్లనే కదా మన బావగారు ఓపెన్ చేసిన కౌంటర్ కనీ వినీ ఎరుగని రీతిలో టికెట్ల అమ్మకాలు సాగించడం సాధ్యమయింది.


కాబట్టి చిరూ, రాజకీయాల్లో అభిప్రాయాలు మార్చుకోవడం సహజమే, రాజకీయాలు అధికార సాధనకే. కాదని ఎవరైనా అతను అబద్ధమైనా చెబుతుండాలి, లేదంటే అతను జయప్రకాష్ నారాయణ్ అయినా అయ్యుండాలి(రెండో పాయింట్లో).